Þjálfun fyrir 10 km hlaup 19.mars

Málþing um þjálfun fyrir 10 km hlaup verður haldið þann 19.mars næstkomandi í E-sal ÍSÍ að Engjavegi 4 kl 20:00 - 21:15.  Fjallað verður um þjálfun fyrir 10 km hlaup og hvað þarf helst að leggja áherslu á.  Getur 10 km þjálfun gagnast í öðrum vegalengdum.

 

Framsögumenn eru þeir Gunnar Páll Jóakimsson, íþróttafræðingur og þjálfari, og Stefán Guðmundsson hlaupari og læknanemi.

 

 

 

Fimmtudagsæfing

Æfingin verður tempóæfing að venju þar sem í boði eru 7 - 14 km. hvort heldur sem farið verður innanbæjar eða Votinn stór eða lítill.

 Byrjendurnir verða  með eins æfingu og á þriðjudaginn..

 KOMASO

 Sigmundur 

Þriðjudagsæfing

Á morgun verðum við með hraða í hagahringnum. Nú er um að gera að taka vel á því daginn farið að lengja og eintóm gleði.

 Byrjendahópurinn bætir 30 sek. við á hlaupum. Gaman hve viðbrögðin hafa verið góð og vonandi að þessi hópur sé komin til að vera !!!

 

 

Trölla-Þorrapítsuhlaup

Hið árlega og óviðjafnalega Trölla-Þorrapítsuhlaup Frískra Flóamanna fór fram í dag. Prúðbúnir hlauparar stigu í rútu Guðmundar Tyrfingssonar og tóku rúnt um bæinn og Ölfusið undir sagnalist hins snjalla sagnamanns Bjarna Harðarsonar. Bjarni fræddi okkur um tröll og forynjur og sagði frá þjóðlegum fróðleik úr Flóa og Ölfusi.  Frískir sprettu úr spori á milli. Endað í gómsætri Þorrapítsu í Kaffi Krús þar sem Sigmundur var heiðraður í tilefni 60 ára afmælisins. Myndir í albúmi.

 

Fjölmenni á byrjendanámskeiði

 

Byrjendanámskeið Frískra Flóamanna hófst í dag undir stjórn Sigmundar. Um 60 manns mættu á fyrstu æfinguna, byrjendur sem lengra komnir.  Reyndari hlauparar fóru í Hagaspretti en byrjendahópurinn tók skokk og göngu. Á fimmtudaginn er svo Þorrapítsuhlaup og rútuferð með tröllaívafi.

Trölla-Þorrapítsuhlaup fimmtudag 7. febrúar

Þá er komið að hinni árlegu Þorrapítsu. Í ár verður hún með trölla og óvissu ívafi.
Brottför verður frá Sundhöll Selfoss klukkan 17:15 undir leiðsögn tröllasérfræðingsins Bjarna Harðarsonar. Hlaupið verður á milli trölla og endað á því að fá sér þorrapítsu á kaffi krús.
Gaman væri ef að sem flestir gætu mætt íklæddir lopa td. lopahlaupabuxur eða lopasokkum.
Endilega takið með ykkur vini og vandamenn. Verð fyrir ferð og pítsu er 2000 krónur. Skráning fyrir miðvikudaginn á fésbókarsíðu Frískra.

 

Ókeypis byrjendanámskeið hefst 5. febrúar

Frískir Flóamenn undir undir styrkri stjórn Sigmundar Stefánssonar  þjálfara bjóða nú uppá hlaupanámskeið fyrir byrjendur. Námskeiðið „Úr sófa í 5km" hefst þriðjudaginn 5. febrúar kl 17.15 við Sundhöll Selfoss. Markmiðið er að geta hlaupið 5 km eftir 9 vikna námskeið. Hlaupið verður með þjálfara þriðjudaga og fimmtudaga kl 17.15 og án þjálfara á laugardögum kl 10.00.  Sams konar námskeið var haldið á sl. vetri og var það mjög vel sótt.

Allar æfingar hjá Frískum Flóamönnum, jafnt hjá byrjendum sem lengrakomnum eru ókeypis

 

Hlaupið undan vindi í vor

Frískir Flóamenn hafa endurvakið "Hlaupið undan vindi" sem er 10 km hlaup sem haldið var á árunum 2003-2006. Hlaupið er undan vindi upp eða niður Gaulverjabæjarveg eftir því hvernig vindar blása. Brautin er marflöt og því er hlaupið tilvalið til að ná góðum tímum. Nú er bara að reima á sig hlaupaskóna og hefja undirbúning fyrir bætingu á tíma í 10 km hlaupi í  "Hlaupinu undan vindi".

Nýjir búning Frískra Flóamanna

Nú eru nýju búningar Frískra Flóamanna að verða tilbúnir, og jakkar fara í merkinu á morgun miðvikudag. Búninganefnd boðar alla sem hafa pantað búninga í Efnalaugina á fimmtudaginn í næstu viku (17. jan) til að nálgast jakkana merkta og fína. Tækifærið verður líka notað til að ljósmynda hópinn.

Á fimmtudag (10. jan) geta þeir sem eru búnir að borga gallana nálgast buxur og peysur hjá Kidda í Efnalauginni.

Athugið að Þeir sem eiga eftir að borga gallana og ætla að vera með eru vinsamlega beðnir um að greiða sem allra fyrst. Bankaupplýsingar eru 0586-26-413 kt. 420507-0110 kr.16.000,- og merkja innlegg kennitölu.

Frískir í Gamlárshlaupi ÍR

Gamlárshlaup ÍR fór fram á gamlársdag. Hlaupinn var 10 kílómetra hringur og geystust 909 hlauparar frá Hörpunni og komu vindbarnir í mark á sama stað. Kári Steinn var að vanda fyrstur, hljóp á 32:48 mín.  Arndís Ýr Hafþórsdóttir hljóp fremst allra kvenna og kom í mark á 41:02 mín.
Frísku Flóamennirnir Ingvar, Vigfús og Magnús tóku þátt.  Þetta var í 34. sinn í röð sem Ingvar hlóp Gamlárshlaupið en þess má geta að þetta var í 37. sinn sem hlaupið var haldið. Geri aðrir betur.  Úrslitin og myndir frá hlaupinu má sjá á hlaup.is.