Sigrún í Manchestermaraþoni

Sigrún hljóp maraþon í Manchester í dag, endaði á 03:25:09 og varð í 51. sæti í kvennaflokki og 22. sæti í sínum aldursflokki. Sigrún  bætti sinn fyrri árangur um meira en 3  mín. Flott hjá henni.  Sigrún fór fyrri hluta hlaupsins á feikna hraða en millitíminn á 10 km var tæpar 44 mín og  tæpar 1:36 eftir hálft.  Seinni hluti hlaupsins var hægari. Til hamingju Sigrún.

Frískir fjölmenntu í Flóahlaupið

Frískir Flóamenn fjölmenntu í Flóahlaupið í dag.  Aðstæður voru þokkalegar, austlægur vindur, hlýtt en það rigndi. Góður vindur var í bakið síðustu tvo km. Auður og Bjarni voru að fara sitt fyrsta keppnishlaup og stóðu sig vel. Nokkrir voru að bæta sína persónulegu tíma. Wieslaw vann 50 ára flokkinn í 10 km á 40:25, og Ingvar var þriðji á 42:30, Magnús var annar í 60 ára flokknum.  80 hlauparar þreyttu 10 km hlaupið, fyrstur þeirra var stórhlauparinn Kári Steinn Karlsson á rúmum 31 mín og er það brautarmet. Svava Rán Guðmundsdótir var fyrst kvenna á 41:03. Flott hlaup og mmm góðar kökur á eftir ;). Myndir í albúmi. Úrslitin eru á hlaup.is.

Frískir hópast til Munchen 2015

Eins og áður hefur komið fram stefna Frískir Flóamenn á hlaupaferð til Munchen haustið 2015 með Bændaferðum. Staðfesting er komin á því að við fáum 40 sæti þannig að allir sem komnir eru á lista komast með. Nú eru 39 skráðir og ætla 21 að fara í 6 daga ferð og 18 í 4 daga ferðina. Í haust  (okt-nóv) þarf svo að greiða staðfestingargjald.  Nánar um það síðar.

Hlaupaferð til Munchen 2015

Eins og áður hefur komið fram erum við að stefna á ferð  til Munchen með Bændaferðum haustið 2015. Utanlandsferðin var rædd á aðalfundinum um daginn og kynnt á facebook og fékk almennt góðar undirtektir. Í Munchen er boðið uppá maraþon, hálft maraþon og 10 km hlaup. Flogið er beint til München þar sem gist verður á hóteli  í þrjár / fimm nætur en velja má milli á 4 og 6 daga ferða. Hlaupið í ár (2014) fer fram sunnudaginn 12. október en í þá ferð er uppselt. Mun að líkindum verða á svipuðum tíma árið 2015.  Höfum verið í sambandi við bændaferðir til að taka frá sæti fyrir hópinn. Þar sem sætafjöldi er takmarkaður (nú þegar hefur annar hópur tekið frá sæti) vilja þeir að við tökum sama hverjir ætla að fara í ferðina, því fyrr því betra.  Köllum við nú eftir hverjir hafa hugsað sér að fara í ferðina. Gefið nafn og takið fram hvort þið viljið styttri eða lengri útgáfuna (4 eða 6 daga ferð) og hvaða vegalend er stefnt á, til að reyna að tryggja að hver fái þá útgáfu sem hún/hann vill.   Vinsamlegast svarið með því að senda á netfangið [e-mail] í síðasta lagi 8. mars nk.   

Hér er slóð þar sem þið getið kynnt ykkur nánar upplýsingar um ferðina 2014 http://www.baendaferdir.is/hreyfiferdir/hlaupaferdir/munchen-marathon-6-dagar.

Að sögn Bændaferða má reikna með að hún verði með líkum hætti 2015 og að verð ferðarinnar breyttist einungis lítilsháttar á milli ára. 

Ingvar með tvö HSK-met á meistaramóti öldunga

Ingvar tók þátt í  meistaramóti öldunga innanhúss um helgina. Hann gerði sér lítið fyrir og setti tvö HSK-met í 800 m og 3000 m í flokki 55-59 ára .  Ingvar hljóp 800 m á 2:39,62 og 3000 m á 11:07,38 og nældi í silfur og brons. 

21 km afmælishlaup Svanlaugar

 

Í dag hjóp flottur flokkur Frískra niður Gaulverjabæjarveg Holtsveg og að sundlauginni á Stokkseyri samtals 21 km. Svanlaug varð 40 ára í vikunni og hljóp 21 km í tilefni þess og lauk því með stæl. Skemmtilegt hlaup í fínu veðri en heldur svölu. Myndir í albúmi.

Aðalfundur Frískra Flóamanna þriðjudaginn 11. febrúar

Aðalfundur Frískra Flóamanna verður haldinn í Tíbrá, þriðjudaginn 11 febrúar 2014 kl 20.00. Nú er mál að fjölmenna, heyra af starfsemi félagsins og láta í sér heyra.

Þorrapizza í Tryggvaskála

                                                                Fjölmenni kom í Þorrahlaup og Þorrapizzu Frískra Flóamanna sem var í Tryggvaskála í kvöld.  Eftir hlaup var farið í heita og kalda pottinn í sundlauginni.  Sumir voru í föðurlandinu sem vakti athygli sundlaugargesta en í lauginni var m.a. hópur erlendra ferðamanna sem furðuðu sig á sundfatatísku landans. Þorrapizzurnar frá Kaffi Krús sviku engan. Sjá myndir í albúmi.

Þorrahlaup og þorrapizza 30. janúar.

 Þorrinn er fjórði mánuður ársins samkvæmt gamla norræna tímatalinu og hefst alltaf á föstudegi milli 19. og 25 janúar. Fyrsti dagur Þorra er nefndur bóndadagur. Í ár er ber þann dag upp á 24. janúar.  Þorrinn er sá tími þar sem fjölskyldur, vinir, sveitungar og samhlauparar koma saman til að lyfta sér upp, borða íslenskt súrmeti með rófustöppu, kæstan hákarl og fleira.  Frískir Flóamenn gera sér glaðan dag á Þorranum, hlaupa þorrahlaup og éta síðan hina sérstæðu og gómsæta Þorrapizzu. Hefur sá síður tíðkast í áraraðir. Að þessu sinni varð fimmtudaginn 30. janúar fyrir valinu og verður hlaupið frá sundlauginni á Selfossi kl. 17.15.  Þorrapizzan verður síðan snædd í Tryggvaskála klukkan 19:00, tími fyrir þorrabað eftir hlaup í heita pottinum í Sundhöll Selfoss. Þeir sem vilja sleppa hlaupinu eru velkominr í Þorrapizzuna. Verð 1500 krónur á mann. Þeir sem ætla að mæta í þorrapizzuna láti Maríu Marons vita eða tilkynni sig á fésbókarsíðu Frískra Flóamanna en þar er búið að stofna viðburðurinn og hægt að haka á mæti.

Gamlárshlaup ÍR

Gamlárshlaup ÍR var í Reykjavík í dag  og er þetta í 38. sinn sem það er haldið. Alls luku 969 manns hlaupinu og hafa aðeins einu sinni verið fleiri. Hlaupnir voru tíu kílómetrar með upphaf og endi við Hörpu. 

Tveir Frískir Flóamenn tóku þátt Renuka og Ingvar.  Renuka kom í mark á 52:12 og Ingvar var á 42:49. Þetta var í 35. Gamlárshlaup Ingvars.  Geri aðrir betur. 

Kári Steinn Karlsson var fyrstur í karlaflokki, hann hljóp á 31:07 en Arndís Ýr Hafþórsdóttir var fyrst í kvenna, á 37:45.