Áheitavefur fyrir Reykjavíkurmaraþon opnaður

Eins og áður hefur komið fram ætla Frískir Flóamenn að hlaupa í Reykjavíkurmaraþoni til styrktar Parkinsonsamtökunum. Opnaður hefur verið nýr áheitavefur fyrir Reykjavíkurmaraþon 2010, hlaupastyrkur.is. Hver hlaupari safnar áheitum. Til að hefja söfnun þurfa hlauparar að fara inn á vefinn og velja „nýskráning“, velja síðan góðgerðarfélag, Parkinsonsamtökin á Íslandi. Hægt er að setja inn mynd af sér og segja hversvegna við hlaupaum fyrir tiltekið málefni. Hægt er að safna áheitum í tveimur flokkum; sem boðhlaupslið eða sem einstaklingur sem tekur þátt í maraþoni, hálfmaraþoni, 10 km hlaupi eða 3 km skemmtiskokki. Þú þarft að fá einhverja til að heita á þig, einstaklinga eða fyrirtæki og þarft því að láta vita af því að þú ert að hlaupa til að safna áheitum, t.d. með tölvupósti eða á Facebook. Áheit er hægt að greiða með kreditkorti eins og verið hefur undanfarin ár en auk þess er hægt að heita á hlaupara með því að senda sms skilaboð. Minni á íþróttadrykki frá MS sem eru í afgreiðslunni í sundlauginni eftir hlaupaæfingar FF.

Laugavegshlaupið 17. júlí tókst vel.

267 haupar luku Laugavegshlaupinu sem fram fór í dag. 279 lögðu af stað frá Landmannalaugum 12 urðu frá að hverfa. Veðrið var gott en þó var nokkur hiti og sterkt sólskin sem olli heldur miklu vökvatapi. Öskufjúk var ekki til vandræða. Sigurvegari í karlaflokki var Þorlákur Jónsson á tímanum 4:48:0 og í kvennaflokki Helen Ólafsdóttir á tímanum 5:21:12 og er það brautarmet. Þrjár hetjur úr Frískum Flóamönnum hlupu, Karól, Anna María og Anna Stefáns og stóðu þær sig með príði. Þær voru allar að fara sitt fyrst Laugavegshlaup. Myndir eru úr hlaupinu í myndaalbúmi.  Úrslit eru á; www.marathon.is/urslit/urslit-2010-ultra

Drykkir frá MS eftir hlaupaæfingar

Nú styttist í Reykjavíkurmaraþon sem verður laugardaginn 21. ágúst. Þar ætla Frískir Flóamenn að hlaupa til styrktar Parkinsonsamtökunum. MS ætlar að styðja þetta átak með því að færa okkur íþóttadrykki (sjá http://www.ms.is/Naering-og-heilsa/Heilsuvorur/Hledsla-ithrottadrykkur/). Drykkir verða til reiðu i Sundhöll Selfoss eftir hlaupaæfingar Frískra Flóamanna, þriðjud. og fimmtud. kl. 17:25, laugadaga kl. 10 og sunnudaga kl. 10:30. Nú er ekki seinna vænna en að fara að koma sér í form, mæta á æfingar og svala sé að þeim loknum á uppbyggjandi íþróttadrykk.

Fundur um Laugavegshlaupið miðvikudag 7. júlí kl. 20:30

Nú styttist óðum í Laugavegshlaupið sem verður 17. júlí. Annað kvöld (7.júlí) kl.20:30 verður fundur hjá Jóni Frantz og Elfu að Birkivöllum 6, kl 20:30 þar sem farið er yfir málin. Það er nokkuð ljóst að Laugavegurinn verður farinn nema ef það gerir mikið óveður, við þurfum hins vegar að vera við öllu búinn vegna mikillar ösku og væntanlegra vandamála sem fylgja henni. Mikilvægt er að allir mæti sem ætla að aðstoða á Laugavegium. Eins ef þið forfallist annað hvort á fundinn eða á Laugaveginn sjálfan þá endilega látið Jón vita í tíma. Margir hafa hætt við að hlaupa vegna öskunnar en þó eru enn skráðir 320 hlauparar, þannig að allt stefnir í að þetta verði næst stærsta hlaupið frá upphafi.

Nýtt brautarmet í Bláskógarskokki

Það voru 54 manns sem hlupu Bláskógarskokkið í dag í blíðskapar veðri.   Hlaupið er yfir Lingdalsheiðina að Laugarvatni,  16,1 og 5 km, 44 fóru lengri vegalengdina. Fyrstur allra í mark í 16,1 km var Kári Steinn Karlsson á 53:51 sek sem er nýtt brautarmet. Fyrsta kona í mark var Jóhanna Ólafsdóttir á 1:10:06.  Úrslit eru á hlaup.is. Í tilefni 100 ára afmælis HSK fengu þátttakendur sérmerktan afmælispening. Gaman hefði verið að sjá fleiri Fríska Flóamenn í hlaupinu.

Myndir úr hlaupinu eru í albúmi.

Laugavegshlaupinu hefur ekki verið aflýst

Hlauphaldarar hafa verið að íhuga hvort aflýsa eigi Laugavegshlaupinu vegna ösku sem er á hlaupaleiðinni. Nú hefur verið afráðið að stefna að því að halda hlaupið, þó með þeim fyrirvara að ef mat manna verði það, á dögunum fyrir hlaup, að aðstæður leyfa ekki að hlaupið verði haldið geti reynst nauðsynlegt að aflýst hlaupinu. Þetta kemur fram á heimasíðu hlaupsins marathon.is.

Bláskógarskokkið 26. júní

Bláskógaskokk HSK verður haldið laugardaginn 26. júní nk. og hefst kl. 11:00. Hlaupin verður hin geysifallega leið frá Gjábakka, eftir Gjábakkavegi (Lingdalsheiði), að Laugarvatni. Ein drykkjarstöð er á hlaupaleiðinni og er þar vatn í boði. Reynt verður að takmarka bílaumferð um veginn meðan á hlaupinu stendur.Vegalengdir eru 5 km og 10 mílur (16,09 km) með tímatöku. Flokkaskipting bæði kyn: 16 ára og yngri,17-39 ára, 40-49 ára, 50 ára og eldri. Í 5 km er keppt í flokkum 16 ára og yngri og 17 ára og eldri hjá báðum kynjum.Hægt er að forskrá sig á hlaup.is og greiða með kreditkorti. Forskráningu á hlaup.is lýkur föstudaginn 25. júní kl. 21:00. Skráning verður einnig í íþróttahúsinu að Laugarvatni fyrir hlaup. Allir keppendur þurfa að mæta við íþróttahúsið á Laugarvatni þar sem þeir staðfesta skráningu og fá afhent keppnisnúmer frá kl. 9:00 á keppnisdag. Þaðan verður rútuferð á Gjábakka kl. 10:30. Skráningargjald er 500 kr. fyrir 16 ára og yngri og 1.500 kr. fyrir 17 ára og eldri og greiðist áður en hlaup hefst. Innifalið í skráningargjaldi er rútuferð frá Laugarvatni að rásmarki og aðgangur að sundlaugina á Laugarvatni. Allir þátttakendur fá verðlaun. Sérverðlaun verða veitt fyrir fyrsta karl og fyrstu konu í 16 km. Keppendur fá frían aðgang í sund. Verðlaunaafhending verður á íþróttavellinum á Laugarvatni strax eftir hlaup. Umf. Laugdæla sér um framkvæmd hlaupsins eins og undanfarin ár.Nánari upplýsingar veita Kári Jónsson í síma 824 1260 og Ingvar Garðarsson í síma 482 2730 og 698 5730. Hvet alla til að taka þátt í þessu skemmtilega hlaupi í fallegu landslagi.

Ingileif og Sigmundur hlupu yfir Eyrarsundsbrúna (ath. leiðréttir tímar)

Í gær, 12. júní, tóku Ingileif og Sigmundur þátt í Brúarhlaupinu, sem er hálft marathon og er yfir Eyrarsundsbrúna milli Danmerkur og Svíþjóðar. Þau luku hlaupinu fímum tíma á 2:04. Guðmundur Tryggvi Ólafsson hljóp líka og var hann á tímanum 1:28.  Aldeilis frábær tími.  Margrét Sigurðardóttir sveitarstjóri í Flóahreppi var einnig í hlaupinu og lauk á 2:36. Hlaupið var haldið í tilefni þess að 10 ár eru liðin frá því brúin var vígð en þá var einnig hlaupið yfir brúna. Þátttakendur voru 30 þús.

(Vonandi eru þetta réttir tímar en skráðir tímar eru víst í talverðu rugli) .

Verið er að meta hvort Laugavegshlaupinu verði aflýst. Ný hlaupaleið í undibúningi.

Ákvörðun mótshaldara um hvort Laugavegshlaupi verði aflýst verður tekin í næstu viku. Verið er að meta ástandið á hlaupaleiðinni. Aska er það mikil að ef ástand breytist ekki næstu daga er séð fram á að aflýsa þurfi Laugavegshlaupinu 2010. Ný hlaupaleið er í undirbúningi fyrir skráða þátttakendur.  Ef Laugavegshlaupi verður aflýst þarf hver og einn þátttakandi að ákveða hvað hann vill gera og svara því hvort hann vilji vera þátttakandi á nýrri leið eða hætta alfarið við.Næsta tilkynning um stöðu mála berst 16. júní næstkomandi.(sjá frekar á marathon.is)

Óvissa með framkvæmd Laugavegshlaupsins

Eftir að eldgos hófst í Eyjafjallajökli hefur Laugavegshlaupið verið í nokkurri óvissu. Í fyrstu var það spurning hvort fært yrði inn í Þórsmörk en nú er það askan. Aska frá gosinu er nú á öllu Laugavegssvæðinu frá Landmannalaugum í Þórsmörk. Minnst er af henni næst Landmannalaugum en meira eftir þvi sem nær dregur Þórsmörk. Framkvæmdaraðilar eru í sambandi við ýmsa sérfræðinga og hyggjast gefa upplýsingar um stöðu mála í vikunni. Nú er aðeins rúmur mánuður í hlaupadag. Eins og kunnugt er hafa Frískir Flóamenn aðstoðað við hlaupið á undanförnum árum.