Heimsókn í Hveragerði

Frískir Flóamenn gerðu góða ferð í Hveragerði laugardaginn 14. janúar. Hamarsmenn tóku vel á móti níu Frískum og Pétur leiddi hóp um 30 hlaupara um mishálar götur í Hveragerði, og aðeins út fyrir bæinn, en þar var auður vegur. Þá var farið í heitan og kaldan pott í lauginni í Laugarskarði. Hlýddum svo á mjög áhugaverða fyrirlestra, Trausta, Herdísar og Guðjóns. Trausti, sem er læknir, fjallaði um hugarfar og hversu mikilvægt það væri að líta björtum augum á lífið, sýndi með myndum niðurstöður um hvernig létt lund lengdi lífið. Herdís matvælafræðingur, fjallaði um næringu og gaf ráð um hvað við hlauparar ættum að legga okkur til munns. Þá tók Guðjón við, en hann er sjúkraþjálfari, og ræddi um álagsmeiðsl hjá hlaupurum og meðferð þeirra. Lagði hann áherslu á að hlauparar gerðu eitthvað í málunum fyndu þeir fyrir meiðslum. Guðjón tók síðan hópinn í styrktaræfingar. Súpa og brauð í lokin í boði Hamarsmanna. Takk fyrir okkur Pétur og Lísa og allir Hamarsskokkarar.